|
Dövlət qulluğu sahəsində Koreya və Azərbaycan əməkdaşlığı genişlənir |
|
|
|
16.12.2009 |
2009-cu il 16 dekabr tarixində Azərbaycan Respublikasının Prezidenti yanında Dövlət Qulluğu Məsələləri üzrə Komissiyada Koreya Respublikasının Dövlət Qulluqçularının Mərkəzi Təlim İnstitutunun Beynəlxalq təlim və əməkdaşlıq departamentinin rəhbəri Kyung Baenin başçılıq etdiyi nümayəndə heyəti ilə görüş keçirilmişdir.
Qonaqları salamlayan Azərbaycan Respublikasının Prezidenti yanında Dövlət Qulluğu Məsələləri üzrə Komissiyanın sədri Bəhram Xəlilov bu ilin 27-30 oktyabr tarixlərində Koreyaya etdiyi səfər zamanı keçirdiyi görüşlərin, o cümlədən Dövlət Qulluqçularının Mərkəzi Təlim İnstitutunda keçirdiyi görüşlərin dövlət qulluğu sahəsində ikitərəfli əlaqələrin inkişafı baxımından əhəmiyyətli olduğunu qeyd etmişdir.
Cənab Kyung Bae Dövlət Qulluqçularının Mərkəzi Təlim İnstitutunun təlim və təhsil proqramları haqqında geniş məlumat verərək bu İnstitutda müxtəlif ölkələrin yüksək vəzifəli dövlət qulluqçularının təlim keçdiyini bildirmişdir.
Görüş zamanı Koreya tərəfi Azərbaycan Respublikasının dövlət qulluqçularının bu İnstitutda təlim keçməsində maraqlı olduğunu qeyd etmiş və tərəflər arasında bu barədə ümumi razılıq əldə edilmişdir.
Qarşılıqlı anlaşma şəraitində keçən görüşdə Azərbaycan Respublikasının Prezidenti yanında Dövlət Qulluğu Məsələləri üzrə Komissiya ilə Koreya Respublikasının Dövlət Qulluqçularının Mərkəzi Təlim İnstitutu arasında dövlət qulluğu sahəsində əməkdaşlığın genişləndirilməsi və digər məsələlər də müzakirə olunmuşdur.
|
